Alunelul

Cos nosos palillos chinos en 6º de Infantil acompañamos está divertida audición chamada Alunelul. Non só traballamos o ritmo senón tamén o movemento, adaptándoo á velocidade da música. Ademais vivenciamos a estrutura desta peza, diferenciando a parte A (onde tocamos cos palillos) da parte B (onde avanzamos e nos movemos).

Danza dos sete saltos

 O alumnado de 3º de Primaria estivemos traballando con esta danza de Dinamarca, chamada ¨Danza dos 7 saltos¨.

Con ela non só desfrutamos, senón tamén desenvolvemos o oído musical, a estrutura temporal, ritmo, movemento, coñecemento físico e psicomotricidade.

Coa proposta do noso proxecto Tiroliro, ademais diferenciamos os instrumentos de vento-metal, de agudo a grave: trompeta, trompa, trombón e tuba. 

É unha música acumulativa, que consta de 7 voltas e cada unha delas é interpretada neste caso, por un instrumento de vento-metal. 

Temos que seguir mellorando e agudizando a memoria!

A regueifa dos de 5º

A regueifa é un desafío improvisado e cantado en verso de unha ou un conxunto de persoas que se retan entre si. 

É de orixe galego_portuguesa, con parecido ao rap actual, pero as regueifas son de orixe popular e eran transmitidas oralmente.

En 5º quixemos poñer en práctica unha regueifa, do proxecto Tiroliro. Cantamos e acompañamos cos instrumentos de placas, aínda que modificamos o acompañamento. 

Empregamos coplas populares como a primeira, pero tamén houbo un traballo de improvisación onde por grupos crearon varias e de entre todas escollimos a última que cantamos.

Agudo e Grave

En Infantil e 1º de primaria, un dos contidos que traballamos nalgunhas sesións, é a altura do son,  diferenciando os extremos: son agudo e son grave. 

Coa axuda do pandeiro (grave) e do triángulo (agudo), fixemos un xogo de recoñecemento auditivo, onde tiñamos que encollernos se o son era grave (soaba o pandeiro), ou estirarnos se o son era agudo (soaba o triángulo).

Mirade que divertido!

Logo fixemos dous equipos: equipos de agudos e equipos de graves, e fomos acompañando co ritmo proposto pola mestra (ta, ta, titi, ta) a canción chamada ¨Letkiss, de Roberto Delgado¨

Do - re - mi - sol - la, metalnotas

 En 2º xa levamos aprendidas estas cinco notas. Entoamos e cantamos ademais de practicar a súa colocación no pentagrama axudados destas divertidas arañas.

Podemos seguir practicando dende a casa, movendo as notas/arañas e colocándoas no seu sitio no pentagrama.

Ademais practicamos coas metalnotas, con esta partitura do proxcto ¨Tiroliro¨, fixándonos nas mans: D = dereita E= esquerda.

Traballamos un montón de contidos, de xeito práctico:

linguaxe musical (compás, figuras, forte e piano, notas...), entoación, interpretación musical, agarre de baquetas e alternancia de mans.

8 MARZO: Día internacional da muller

Como cada 8 de marzo celebramos o Día da muller reivindicando a igualdade que merecemos, pois todos e todas podemos ser o que queiramos ser.

Fixen unha selección de músicas para este día, e agardo que vos gusten. Son moitas das miñas favoritas. O debuxo tamén dun favorito, o pintor Leandro Lamas. 

Con cal vos quedades? Podedes escoller unha, deixando en comentarios.

(Para velo mellor, podedes mover a barra lateral e inferior)

23 de febreiro: Día de Rosalía de Castro

Aquí vos deixo unha selección de música que me gusta, inspirada na poesía de Rosalía de Castro. 

Mañá 23 de febreiro é o seu día e lembrámonos dela, como unha escritora a quen seguir como exemplo.

Agardo que vos gusten!

O ROCK DA DUCHA - Migallas

Esta canción está sendo un éxito. Ademais de cantala, acompañamos con un baile movéndonos  por toda a clase, e como ten ritmo de Rock gústanos un montón.

Déixovos o vídeo e a letra da canción, para que poidades seguir cantando dende a casa.

Sambori musical

Hoxe traio unha proposta de @teresapatapum para aprender a escala musical, coa canción do método batucado, que puxen en práctica con algúns nenos e nenas do cole.

O ideal é colorear a nosa ¨mariola musical¨ e logo xogar e cantar ao mesmo tempo que imos indicando as notas con unha marioneta que queiramos, eu escollín o meu lapis de estrela máxico1

CANCIÓN ORIXINAL DO MÉTODO BATUCADO

30 de xaneiro: Día da Paz

 No cole recibimos o día da paz como máis nos gusta... CON MÚSICA! 

LEMBRADE: A paz ten que ser todos os días!

Xogos de ritmo con palillos chinos

Empregamos os palillos chinos para xogar con distintos ritmos, que poden servirnos para acompañar melodías.

Con este vídeo de La Bombocova podedes seguir practicando dende as vosas casas. O próximo paso vai ser acompañar os ritmos con movemento.

Xa chegou o día da Paz: Pablo Díaz

A próxima parada que faremos no calendario é o Día da Paz o 30 de Xaneiro. 

Para conmemorar este día traballaremos na aula de música con esta canción de Pablo Díaz, do seu libro/cd Tic Tac Toc. A nivel centro intentaremos facer unha montaxe como a do ano pasado, a ver se o conseguimos!

Déixovos a letra da canción, o vídeo mais a canción que fixemos o ano anterior.

A PROPOSTA DO ANO PASADO VEU DA MAN DE PACO NOGUEIRAS, ¨MÓVETE¨...

 Lembrades?